SCROL

Thursday, September 22, 2016

ரவீந்திரநாத் தாகூர்

ரவீந்திரநாத் தாகூர்


கொல்கத்தாவில், 1861-ம் வருடம், ஒரு பணக்காரக் குடும்பத்தில் 14-வது குழந்தையாகப் பிறந்தார் ரவீந்திரநாத் தாகூர். வீட்டிலேயே அறிவியல், கணிதம், வரலாறு, பூகோளம், வடமொழி, வங்காளம், ஆங்கிலம், இசை, ஓவியம், உடற்பயிற்சி என எல்லா கலைகளையும் கற்கத் தொடங்கினார். ஏழாவது வயதிலேயே கவிதை புனையவும் தொடங்கினார். 1877-ம் ஆண்டு வெளியான தாகூரின் முதல் நாடகத் தொகுதியில், வங்காள மொழியின் முதல் சிறுகதை இடம் பெற்றது. வழக்கறிஞர் பட்டம் பெறுவதற்காக இங்கிலாந்து சென்ற தாகூர், அந்தப் படிப்பு பிடிக்காமல் இரண்டே வருடத்தில் இந்தியா திரும்பினார். 22-வது வயதில் திருமணம் முடிந்ததும் குடும்ப நிர்வாகத்தைக் கையில் எடுத்துக்கொண்டார்.1901-ம் வருடம், சாந்திநிகேதனில் ஓர் ஆசிரமப் பள்ளியை நிறுவி, அங்கேயே தங்கினார். அங்கு மாணவர்களுக்குத் தாய்மொழியில் படிப்பு கற்பிக்கப்பட்டதுடன் தோட்டவேலை, உடற்பயிற்சி, சமூகசேவை, விளையாட்டு என அத்தனை கலைகளும் கற்பிக்கப்பட்டன.சுதந்திரப் போராட்டத்தில் நேரடியாக இறங்காமல் இருந்த தாகூர், ஆங்கிலேயர்கள் வங்காளத்தை இரண்டாகப் பிரிக்க முயன்றபோது, தலைமையேற்று போராட்டத்தில் குதித்தார். காங்கிரஸ் கட்சியில் மிதவாதம், தீவிரவாதம் எனப் பிரிவினைகள் தோன்றியது மட்டுமின்றி முஸ்லிம், இந்துக்கள் பிரச்சினைகளும் தலைதூக்கவே நேரடி அரசியலில் இருந்து வெளியேறினார். பல்வேறு நாடுகளுக்கு இலக்கியப் பயணம் மேற்கொண்ட நேரத்தில்தான், தனது கவிதைகளை ஆங்கிலத்தில் மொழிபெயர்த்தார்.'கீதாஞ்சலி'க்கு நோபல் பரிசு கிடைத்ததும், ஆங்கில அரசு 'சர்' பட்டம் கொடுத்துக் கவுரவித்தது. ஆனால், 1919-ம் ஆண்டில் நடந்த ஜாலியன் வாலாபாக் படுகொலையால் அதிர்ச்சிஅடைந்த தாகூர், ஆங்கில அரசு தந்த பட்டத்தைத் தூக்கி எறிந்து, தான் ஆங்கிலேயரின் விசுவாசி அல்ல என்பதை வெளிப்படுத்தினார். காந்தியடிகளுடன் நட்போடு இருந்தாலும், கைராட்டையின் மூலம் சுதந்திரம் பெறுவதை விரும்பாமல், பலமாகத் தட்டுபவன்தான், கதவு திறந்து இருப்பதை அறிவான் என்று உரக்கச் சொன்னார்.உலகிலேயே மிகச் சிறந்த கல்விக்கூடத்தினை உருவாக்கவேண்டும் என்ற தாகூரின் ஆசை அவரது 60-வது வயதில் நிறைவேறியது. 'விசுவபாரதி' என்ற உலகப் பல்கலைக்கழகத்தை சாந்திநிகேதனத்தில் உருவாக்கி, நோபல் பரிசுடன் கிடைத்த பணம், தனது சொத்துகள் மற்றும் புத்தக உரிமைகளையும் இந்தப் பல்கலைக்கழகத்துக்கே எழுதி வைத்தார்.ஒரு கவிதையில், 'மரணம் வந்து கதவைத் தட்டும் நாளில் நீ என்ன செய்வாய்?' என்று கேள்வி கேட்டு, 'வந்த என் விருந்தாளியின் முன்னே தட்டு நிறைய என் வாழ்க்கையைப் பரிமாறுவேன், வெறும் கையுடன் விருந்தாளியை திரும்பவிடவே மாட்டேன்' என்று பதிலும் சொல்லியிருந்தார் தாகூர். அப்படியே அவரது 80-வது வயதில் ஒரு கவிதையைச் சொல்லி முடித்து, கண் மூடிய ஒரு மணி நேரத்தில் அமைதியாக மரணத்தைத் தழுவினார்.

No comments:

Post a Comment