SCROL

Friday, January 6, 2017

'நீட்' தேர்வு அறிவிப்பு எப்போது? : தமிழக மாணவர்கள் எதிர்பார்ப்பு.


'நீட்' தேர்வு அறிவிப்பு எப்போது? : தமிழக மாணவர்கள் எதிர்பார்ப்பு. | மருத்துவப் படிப்புக்கான, 'நீட்' நுழைவுத் தேர்வு அறிவிப்பு, இன்னும் வெளியிடப்படாததால், தமிழக மாணவர்கள் கவலை அடைந்துள்ளனர். நாடு முழுவதும், அனைத்து மருத்துவப் படிப்புகளுக்கும், நுழைவுத் தேர்வு கட்டாயம் என, இந்திய மருத்துவ கவுன்சில் அறிவித்தது. எம்.பி.பி.எஸ்., - பி.டி.எஸ்., படிப்பில் சேர,நீட் நுழைவுத் தேர்வு எழுத வேண்டும் என்ற, இந்திய மருத்துவ கவுன்சிலின் உத்தரவுக்கு, உச்ச நீதிமன்றம், 2016ல் அனுமதி அளித்தது.இதற்கு, தமிழகம், ஆந்திரா, மஹாராஷ்டிரா உட்பட, பல மாநிலங்களில் எதிர்ப்பு எழுந்தது. எதிர்த்த மாநிலங்களில், மாநில ஒதுக்கீடு இடங்களுக்கு, கடந்த கல்வி ஆண்டுக்கு மட்டும், நீட் எழுதத் தேவையில்லை என, விலக்கு அளிக்கப்பட்டது. அதேநேரத்தில், தனியார் கல்லுாரி மாணவர் சேர்க்கைக்கு, நீட் கட்டாயம் ஆனது. இந்த ஆண்டு நீட் தேர்வு தொடர்பாக, எந்த மாநிலத்திற்கும் விலக்கு அளிக்கப்படவில்லை. மே மாதம் நடக்கவுள்ள நீட் தேர்வுக்கு, வழக்கமாக டிசம்பரில், விண்ணப்ப பதிவு துவங்கும். ஆனால், இந்த ஆண்டு இன்னும் விண்ணப்ப பதிவு துவங்கவில்லை. நீட் தொடர்பான அறிவிப்பு, ஒரு மாதத்திற்கு மேல் தாமதமாகியுள்ளது. இதுகுறித்து, தேர்வை நடத்தும், சி.பி.எஸ்.., எனப்படும் மத்திய இடைநிலை கல்வி வாரிய அதிகாரிகள் கூறுகையில், 'நீட் தேர்வு குறித்து, இந்திய மருத்துவ கவுன்சில் சட்டத்தில், திருத்தம் கொண்டு வரப்பட உள்ளது. இந்த மசோதா நிறைவேற்றிய பிறகே, அறிவிப்பு வெளியாகும்' என்றனர்.இதற்கிடையில், பல்வேறு மாநிலங்களும், இந்த ஆண்டே, தங்கள் மாநில மொழிகளில், நீட் தேர்வு எழுத அனுமதி பெற்று வருகின்றன. இதுவரை, ஹிந்தி, ஆங்கிலம் மட்டுமின்றி, குஜராத்தி, மராத்தி, அசாமி, பெங்காலி மற்றும் தெலுங்கு ஆகிய மொழிகளில், நீட் எழுத அனுமதி அளிக்கப்பட்டுள்ளது. இதில், தமிழுக்கு இன்னும் அனுமதிகிடைக்கவில்லை. பிளஸ் 2 பொதுத்தேர்வு துவங்க, இரு மாதங்களே உள்ள நிலையில், திடீரென நீட் கட்டாயம் எனஅறிவிக்கப்பட்டால், என்ன செய்வது என, தமிழக மாணவர்கள் குழப்பத்தில் உள்ளனர்.

 

1 comment:

  1. யார் கேட்டா neet-ஐ
    ஐயா ! நீட்( neet ) தேர்வை தமிழகத்தில் ரத்து செய்ய வேண்டும்
    ஏனெனில் காஷ்மீரில் இருந்து கன்னியாகுமரி வரை ஒரே பாடத்திட்டத்தை கொண்டு வர முடியாத மத்திய அரசு நீட் தேர்வை மட்டும் இந்தியா முழுவதும் எப்படி செயல்படுத்த முடியும் ? அதுவும் தமிழகத்தின் நிலை இன்னும் மோசம் கடந்த 10 ஆண்டுக்கும் மேலாக +2 பாடத்திட்டம் மாறவே இல்லை !.. நீட் தேர்வானது cbse பாடத்திடத்தில் படித்த மாணவர்களுக்கு மட்டுமே எளிது !. தமிழ் வழியில் பயின்ற மாணவர்களுக்கு இது கடினம் தான் ! இன்னும் இது பற்றி போதிய விழிப்புணர்வு கூட கிராமப்புற மாணவர்களுக்கு தெரிந்திருக்காது !
    ஒரு தேர்வு என்றாலே சமமானவர்களுள் புத்திதசாலியை தேர்ந்து எடுப்பது தானே !
    ஆனால் நீட் தேர்வானது அதிபுத்திசாலி(icse), புத்திசாலி(cbse) -க்கு நடத்தப்படும் தேர்வு .!
    இதில் எவ்வாறு தமிழக கிராமப்புற மாணவர்கள் ஜெயிக்க முடியும்?.
    பிராந்திய மொழிகளில் தேர்வு நடத்துவதும் ஏற்புடையதல்ல ! ஏனெனில் மொழி மட்டும் தான் மாறுமே தவிர கடினத்தன்மை அல்ல!

    காஷ்மிரில் இருந்து கன்னியாகுமரி வரை என்று மத்திய அரசால் ஒரே பாடத்திட்டத்தை கொண்டு வர முடியுமோ அன்று இந்த தேர்வானது ஏற்புடையது !.

    அது வரை தமிழகத்தில் நீட் தேர்வை புறக்கணிக்க வேண்டும்.! சாமானிய ஏழை மாணவர்களின் மருத்துவ கனவை நனவாக்க நீட் ஐ புறக்கணிக்க வேண்டும்

    சாமனிய தமிழனின் உரிமையை பறிக்கும் இந்த திட்டம்

    தமிழகத்தில் இருந்து கொண்டு ஏன் இப்படி பதிவிடுகின்றிர்கள்!

    ReplyDelete