KALVISOLAI TNPSC

Tuesday, 2 June 2020

KALVISOLAI CURRENT AFFAIRS -MAY 2020 - கல்விச்சோலை நடப்பு நிகழ்வுகள் - மே 2020

KALVISOLAI CURRENT AFFAIRS -MAY 2020 - கல்விச்சோலை நடப்பு நிகழ்வுகள் - மே 2020
மே.1: 2021-ல் ஆகஸ்ட் 1 முதல் 7 வரை நடைபெறுவதாக இருந்த ஏழாம் ‘காமன்வெல்த் யூத் கேம்ஸ்’ போட்டி, 2023-ம் ஆண்டுக்குத் ஒத்திவைக்கப்படுவதாக அறிவிக்கப்பட்டுள்ளது. மாற்றியமைக்கப்பட்ட டோக்கியோ ஒலிம்பிக் போட்டிகளின் தேதிகளும் காமன்வெல்த் போட்டிகளின் தேதிகளும் ஒன்றாக இருந்ததால், காமன்வெல்த் போட்டிகள் ஒத்திவைக்கப்பட்டுள்ளன.

மே.5: கோவிட்-19 நோய்த்தொற்று காரணமாக நாடு முழுவதும் பொருளாதார நடவடிக்கைகள் முடக்கப்பட்டதால், இந்தியாவில் வேலைவாய்ப்பின்மை 27.11 சதவீதமாக அதிகரித்துள்ளதாக இந்திய பொருளாதாரக் கண்காணிப்பு மையம் தெரிவித்துள்ளது. மார்ச் 15 அன்று 6.74 சதவீதமாக இருந்த நாட்டின் வேலைவாய்ப்பின்மை, மே 3 அன்று 27.11 சதவீதமாக அதிகரித்துள்ளது.

மே.5: பொதுப் பாதுகாப்புச் சட்டத்தின்கீழ் காவலில் வைக்கப்பட்டிருந்த ஜம்மு காஷ்மீர் முன்னாள் முதல்வர் மெஹ்பூபா முஃப்தியின் காவல் மேலும் மூன்று மாதங்களுக்கு நீட்டிக்கப்பட்டுள்ளது. தேசிய மாநாட்டுக் கட்சித் தலைவர் அலி முகம்மது சாகர், மக்கள் ஜனநாயகக் கட்சியின் மூத்த தலைவர்களில் ஒருவரான சர்தஜ் மதானி ஆகியோரின் காவலும் மேலும், 3 மாதங்களுக்கு நீட்டிக்கப்பட்டுள்ளன.

மே.5: தேசிய நுழைவுத் தேர்வுகளான நீட், ஜே.ஈ.ஈ. (மெயின்ஸ்) ஆகியவற்றுக்கான புதிய தேதிகளை மத்திய மனிதவளத் துறை அமைச்சர் ரமேஷ் போக்ரியால் அறிவித்துள்ளார். நாடு முழுவதும் ஜே.ஈ.ஈ. (மெயின்ஸ்) தேர்வுகள் ஜூலை 18 முதல் 23 வரையும், நீட் தேர்வு ஜூலை 26 அன்று நடைபெறும் என்று மனிதவள அமைச்சகம் தெரிவித்துள்ளது. ஜே.ஈ.ஈ. (அட்வான்ஸ்டு) தேர்வு ஆகஸ்ட் மாதம் நடைபெறும் என்று தெரிவிக்கப்பட்டுள்ளது.

மே.7: ஈராக்கின் புதிய பிரதமராக முஸ்தஃபா கதிமி தேர்ந்தெடுக்கப்பட்டுள்ளார். இதன்மூலம் ஏழு மாதங்களாக அந்நாட்டில் நீடித்துவந்து அரசியல் நெருக்கடி முடிவுக்குவந்துள்ளது. அரசுக்கு எதிரான தொடர் போராட்டங்களால் 2019 நவம்பரில் அந்நாட்டுப் பிரதமர் அதில் அப்துல் மஹ்தி ராஜினாமா செய்தார். அதைத் தொடர்ந்து, முன்னாள் புலனாய்வுப் பிரிவுத் தலைவரான முஸ்தஃபாவை ஈராக் நாடாளுமன்றம் பிரதமராகத் தேர்வுசெய்துள்ளது.

மே 7: ஆந்திர மாநிலம் விசாகப்பட்டினத்துக்கு அருகே உள்ள பகுதியான கோபால்பட்டினத்தில் அமைந்துள்ள எல்.ஜி. பாலிமர்ஸ் ஆலையில் அதிகாலையில் ஏற்பட்ட ஸ்டைரீன் நச்சு வாயுக் கசிவால் 12 பேர் பலியாகியுள்ளனர். முந்நூறுக்கும் மேற்பட்டோர் மருத்துவமனையில் சிகிச்சை பெற்றுவருகின்றனர். இரண்டாயிரத்துக்கு மேற்பட்ட குடும்பங்கள் அப்பகுதியில் இருந்து அப்புறப்படுத்தப்பட்டுள்ளன.

மே.12: கோவிட்-19 நோய்த்தொற்றைக் கட்டுப்படுத்துவதற்காக நாடு முழுவதும் நடைமுறைப்படுத்தப்பட்டுள்ள ஊரடங்கு நான்காம் கட்டமாகப் புதிய விதிகளுடன் நீட்டிக்கப்படும் என்று பிரதமர் நரேந்திர மோடி தெரிவித்தார். அத்துடன், நாட்டின் பொருளாதாரத்தை மீட்டெடுப்பதற்காக ரூ.20 லட்சம் கோடி மதிப்பில் திட்டங்கள் அமல்படுத்தப்படும் என்று அவர் அறிவித்தார்.

மே.12: 2020 - உலகளாவிய ஊட்டச்சத்து அறிக்கையில், 2025-ம் ஆண்டுக்கான ஊட்டச்சத்து இலக்குகளை எட்டாத நாடுகளின் பட்டியலில் இந்தியா இடம்பெற்றுள்ளது. ஊட்டச்சத்துக் குறைபாடு அதிகமாக உள்ள நாடாகவும் இந்தியா உள்ளது. ஊட்டச்சத்துக் குறைபாட்டைக் கட்டுப்படுத்தாத நைஜீரியா, இந்தோனேசியா ஆகிய நாடுகளும் இந்தப் பட்டியலில் இடம்பெற்றுள்ளன.

மே.13: 2020 ல், இந்தியாவின் வளர்ச்சி சதவீதம் 1.2 சதவீதமாக இருக்கும் என்று ஐ.நா.வின் ‘உலகப் பொருளாதாரச் சூழல், வாய்ப்புகள் அறிக்கை’ தெரிவிக்கிறது. உலகப் பொருளாதார வளர்ச்சி 2020-ல் 3.2 சதவீதமாக இருக்கும் என்று இந்த அறிக்கை தெரிவிக்கிறது. வளர்ந்த நாடுகளின் உள்நாட்டு உற்பத்தி வளர்ச்சி -0.5 சதவீதமாகக் குறையும் என்றும் கணிக்கப்பட்டுள்ளது.

மே.13: கோவிட்-19 வைரஸ் நீண்ட காலத்துக்கு உலகில் நிலைபெற்றிருக்கும் என்று உலக சுகாதார நிறுவனத்தின் செயல் இயக்குநர் மருத்துவர் மைக்கேல் ரயான் தெரிவித்துள்ளார். இந்த வைரஸைக் கட்டுப்படுத்தத் தடுப்பூசி கண்டுபிடிக்கப்படாத பட்சத்தில், உலக மக்களிடம் இந்த நோய்க்கான எதிர்ப்பாற்றல் உருவாகச் சில ஆண்டுகள் பிடிக்கும் என்று அவர் தெரிவித்தார். ‘எச்.ஐ.வி.' போன்ற பிற வைரஸ்களைப் போல இந்த கரோனா வைரஸும் நம் சமூகங்களில் நிலைபெற்றிருக்கும் என்று அவர் தெரிவித்தார்.

மே.14: இந்திய அரசிடம் தான் ஒப்படைக்கப்படுவதை எதிர்த்து பிரிட்டன் உச்ச நீதிமன்றத்தில் முறையிட அனுமதி கோரியிருந்த இந்தியத் தொழிலதிபர் விஜய் மல்லையாவின் மனுவை லண்டன் உயர் நீதிமன்றம் நிராகரித்தது. இதன்மூலம் 28 நாட்களுக்குள் மத்திய அரசிடம் விஜய் மல்லையா ஒப்படைக்கப்படுவார் என்று எதிர்பார்க்கப்படுகிறது. விஜய் மல்லையாவின் மீது மத்திய அரசு, பணமோசடி வழக்குப் பதிவுசெய்துள்ளது.

மே.15: உலக வங்கி, கோவிட்-19 சூழலை எதிர்கொள்ள இந்திய மருத்துவத் துறைக்கு ஏற்கெனவே 1 பில்லியன் டாலர் (ரூ.7,549 கோடி) கடன் வழங்கியிருந்தது. தற்போது இரண்டாம் கட்டமாக நாட்டின் சமூகப் பாதுகாப்பை மேம்படுத்துவதற்காக மீண்டும் 1 பில்லியன் டாலர் கடனை உலக வங்கி இந்தியாவுக்கு வழங்கியுள்ளது.

மே.19: ஜூன் 1 முதல் ஜூன் 12 வரை நடைபெறுவதாக இருந்த பத்தாம் வகுப்புப் பொதுத்தேர்வுகள் ஜூன் 15 முதல் ஜூன் 25 வரை நடைபெறும் என்று தமிழ்நாடு அரசு அறிவித்துள்ளது. 9.5 லட்சம் மாணவர்கள் இந்த ஆண்டு பத்தாம் வகுப்புப் பொதுத் தேர்வை எழுதவிருக்கின்றனர். பதினொன்றாம் வகுப்புத் தேர்வு ஜூன் 16 அன்று நடைபெறும் என்று அறிவிக்கப்பட்டுள்ளது.

மே.20: பிரிட்டனின் புகழ்பெற்ற கேம்பிரிட்ஜ் பல்கலைக்கழகம் அடுத்த கல்வியாண்டு (ஜூன் 2021 வரை) முழுவதும் ஆன்லைனில் மட்டுமே விரிவுரைகள் நடைபெறும் என்று அறிவித்துள்ளது. கோவிட்-19 நோய்த்தொற்றின் காரணமாக மார்ச் மாதம் பிரிட்டனில் ஊரடங்கு அமல்படுத்தப்பட்டது. வரும் செப்டம்பர் மாதம் கேம்பிரிட்ஜ் பல்கலைக்கழகத்தின் புதிய கல்வியாண்டுக்கான வகுப்புகள் தொடங்குகின்றன.

மே.21: ஐ.நா.வின் 26-ம் பருவநிலை மாநாடு (COP26) பிரிட்டனின் கிளாஸ்கோவில் 2020, நவம்பரில் நடைபெறவிருந்தது. கோவிட்-19 நோய்த்தொற்றின் காரணமாக இந்த மாநாட்டைத் தள்ளிவைப்பதாக பிரிட்டன் கடந்த மாதம் அறிவித்தது. தற்போது, இந்த மாநாடு 2021-ம் ஆண்டு இறுதியில் நடைபெறும் என்று தெரிவிக்கப்பட்டுள்ளது.

மே.21: உம்பன் புயலால் மேற்கு வங்கத்தில் 86 பேர் பலியாகியுள்ளதாக அம்மாநில அரசு தெரிவித்துள்ளது. உம்பன் புயலால் மேற்கு வங்கம் மட்டுமல்லாமல் ஒடிஷாவும் பாதிக்கப்பட்டுள்ளது. இடைக்கால நிவாரணமாக மேற்கு வங்கத்துக்கு ரூ.1,000 கோடி, ஒடிஷாவுக்கு ரூ.500 கோடி நிதி வழங்குவதாக பிரதமர் நரேந்திர மோடி அறிவித்துள்ளார்.

மே.22: கோவிட்-19 நோய்த்தொற்றின் காரணமாக ஐ.நா. பொதுச்செயலாளர் அந்தோனியோ குத்தேரஸ் மார்ச் 23 அன்று உலகளாவிய போர்நிறுத்தத்தை அறிவிக்க வேண்டும் என்று கோரிக்கைவிடுத்தார். போர் பதற்றச் சூழல் நிலவும் 19 நாடுகளைச் சேர்ந்த 6,61,000 பேர் இந்தப் பெருந்தொற்றுக் காலத்தில் வீடுகளை இழந்து இடம்பெயர்ந்திருப்பதாக நார்வே அகதிகள் குழு (NRC) அறிக்கையில் தெரிவித்துள்ளது.

மே.25: உலகம் முழுவதும் கரோனாவால் பாதிக்கப் பட்டவர்களின் எண்ணிக்கை 55,02,512 ஆக உயர்ந்திருக்கிறது. 3,46,761 பேர் உயிரிழந்திருக்கிறார்கள். 23,02,447 பேர் நோயிலிருந்து மீண்டிருக்கிறார்கள். இந்தியாவில் கரோனாவால் 1,38, 845 பேர் பாதிக்கப்பட்டுள்ளார்கள். 4021 பேர் உயிரிழந்திருக்கிறார்கள். 57,720 பேர் நோயிலிருந்து மீண்டிருக்கிறார்கள்.

மே.27: கரோனா வைரஸ் பெருந்தொற்றால் உருவாகியிருக்கும் பொருளாதாரப் பின்னடைவுச் சூழலை எதிர்கொள்ள ஐரோப்பிய நாடுகளுக்கு 750 பில்லியன் யூரோ நிதியை ஐரோப்பிய யூனியன் அறிவித்துள்ளது. 27 நாடுகளை அங்கமாகக் கொண்ட ஐரோப்பிய யூனியன், கோவிட்-19 பொருளாதாரப் பின்னடைவை எதிர்கொள்ளப் பல்வேறு நடவடிக்கைகளை எடுத்துவருகிறது.

மே. 27: இந்தியாவின் ஐந்து வடமாநிலங்களின் வேளாண் நிலங்கள் பாலைவன வெட்டுக்கிளிகளின் தாக்குதலால் கடுமையாகப் பாதிக்கப்பட்டுள்ளன. ராஜஸ்தான், பஞ்சாப், ஹரியாணா, மத்திய பிரதேசத்தின் வேளாண் பயிர்கள், காய்கறிகளைக் கடும் பாதிப்புக்குள்ளாக்கிய வெட்டுக்கிளிகள், உத்தரப்பிரதேசம், மகாராஷ்டிரத்தைத் தொடர்ந்து கர்நாடகத்தின் பயிர்களைத் தாக்கலாம் என்று எச்சரிக்கை விடுக்கப்பட்டுள்ளது. மத்திய வேளாண் அமைச்சர் நரேந்திர சிங் தோமர் வெட்டுக்கிளிகளின் தாக்குதலைச் சமாளிப்பதற்கான 15 வகைப் பூச்சிக்கொல்லிகள் பிரிட்டனிலிருந்து வரவழைக்கப்படும் என்று தெரிவித்துள்ளார்.

மே.28: கோவிட்-19 பெருந்தொற்று காரணமாக ஊரடங்கு அறிவிக்கப்பட்டு 65 நாட்களுக்குப் பிறகு, புலம்பெயர் தொழிலாளர்களுக்கு மத்திய அரசும் மாநில அரசுகளும் கட்டணமின்றிப் போக்குவரத்து வசதிகள், உணவு வசதிகளை ஏற்பாடு செய்துதர வேண்டும் என்று உச்ச நீதிமன்றம் உத்தரவிட்டுள்ளது. உச்ச நீதிமன்றத்தின் மூன்று நீதிபதிகளைக் கொண்ட அமர்வு இந்த உத்தரவைப் பிறப்பித்துள்ளது.

மே.29: சத்தீஸ்கர் மாநிலத்தின் முதல் முதல்வராக இருந்த அஜித் ஜோகி (74) உடல்நலக் குறைவால் ராய்ப்பூரில் காலமானார். அவர் சத்தீஸ்கர் மாநிலத்தின் முதல் முதல் அமைச்சராக 2000, நவம்பர் 1 முதல் 2003, டிசம்பர் 4 வரை பதவிவகித்துள்ளார்.

மே.29: விப்ரோ தகவல் தொழில்நுட்ப நிறுவனத்தின் புதிய தலைமைச் செயல் அதிகாரி, நிர்வாக இயக்குநராக தியர்ரி டேலபோர்ட் நியமிக்கப்பட்டுள்ளதாகவும் ஜூலை 6 அன்று அவர் பதவியேற்பார் என்றும் அந்த நிறுவனம் தெரிவித்துள்ளது.

No comments:

Post a comment