12-ஆம் வகுப்பு விலங்கியல் | பாடம் 3 இனப்பெருக்க நலன் | பாடப்புத்தக மதிப்பீட்டு வினாக்கள் | Q.No 21

12-ஆம் வகுப்பு விலங்கியல் | பாடம் 3 இனப்பெருக்க நலன் | பாடப்புத்தக மதிப்பீட்டு வினாக்கள் | Q.No 21

கேள்வி 21 : “ஆரோக்கியமான இனப்பெருக்கம் சட்டப்படி கட்டுப்படுத்தப்பட்டுள்ள பிறப்புக் கட்டுப்பாட்டு வழிமுறைகள் மற்றும் முறையான குடும்ப நலத்திட்டம் போன்றன மனித வாழ்விற்கு முக்கியமானவை” - கூற்றை நியாயப்படுத்து.

---

முழுமையான மதிப்பெண்கள் பெறுவதற்கான விடை :

1. ஆரோக்கியமான இனப்பெருக்கத்தின் முக்கியத்துவம்

• ஆரோக்கியமான மக்கள் உடல் நலம் மிகுந்த குழந்தைகளைப் பெற்று, குடும்பத்தையும் சமுதாயத்தையும் பாதுகாக்கின்றனர்.
• உடல்நலம் என்பது ஒரு சமூகம் சார்ந்த பிரச்சினை ஆகும்.
• இனப்பெருக்க மண்டலம், நரம்பு மற்றும் வேதி ஒருங்கிணைப்பு மண்டலங்களால் கட்டுப்படுத்தப்படும் ஒரு கூட்டமைப்பாகும்.
• தொற்றுநோய்கள் மற்றும் காயங்கள் ஏதுமின்றி இனப்பெருக்க உறுப்புகளைப் பாதுகாப்பது அவசியமாகும்.

2. சட்டப்படி கட்டுப்படுத்தப்பட்டுள்ள பிறப்புக் கட்டுப்பாடுகள்

• அபரிமிதமான மக்கள் தொகைப் பெருக்கத்தைச் சமாளிக்கப் பிறப்புக் கட்டுப்பாடு முறையான தீர்வாகும்.
• மருத்துவ ரீதியான அவசியம் மற்றும் சமூகப் பயன்களைக் கருதி, இந்திய மத்திய அரசு 1971 ஆம் ஆண்டு கருக்கலைப்பை (MTP) சட்டபூர்வமாக்கியது.
  • இது, தகுதியற்ற போலி மருத்துவர்களால் செய்யப்படும் பாதுகாப்பற்ற சட்டவிரோதமான கருக்கலைப்பைத் தடுக்கிறது.
• வளர்கருவின் பாலினம் கண்டறியப்பட்டு, பெண் கருக்கொலை செய்யப்படுவதைத் தடுக்க அரசு கடுமையான நடவடிக்கைகளை எடுத்துள்ளது.
  • குழந்தை பிறப்புக்கு முன் பாலினத்தை முன்கூட்டியே கண்டறியும் தொழில்நுட்பத்தடைச் சட்டம்-1994 (PCPNDT) மூலம், கருவில் வளரும் குழந்தையின் பாலினத்தைக் கண்டறிந்து தேர்ந்தெடுத்துக் கருக்கலைப்பு செய்யும் தொழில்நுட்பம் சட்டப்படி தடை செய்யப்பட்டுள்ளது.
• தற்காலிக மற்றும் நிரந்தரக் கருத்தடை முறைகளைப் (உறைகள், உள்கருப்பைச் சாதனங்கள், கருக்குழல்தடை போன்றவை) பயன்படுத்தி, குடும்பத்தைச் சிறியதாக அமைத்துக்கொள்ள மக்களை ஊக்குவிப்பது முக்கியமாகும்.

3. முறையான குடும்ப நலத்திட்டம் (RCH)

• குடும்ப நலத் திட்டத்தை முதலில் நடைமுறைப்படுத்திய சில நாடுகளில் இந்தியா முதன்மையானது.
• 1951 ஆம் ஆண்டு தொடங்கப்பட்ட இத்திட்டம், தற்போது "இனப்பெருக்க மற்றும் குழந்தை நலம் பாதுகாப்பு" (RCH) என அழைக்கப்படுகிறது.
• முக்கிய நோக்கம்: உடல் நலம் மிக்க சமுதாயத்தைக் கட்டமைக்கத் தேவையான விழிப்புணர்வை ஏற்படுத்துதல் மற்றும் மருத்துவ உதவி அளித்தல்.
• விழிப்புணர்வு ஏற்படுத்தும் பகுதிகள்:
  • கர்ப்பமடைந்த பெண்கள் பாதுகாப்பு.
  • தாய்-சேய் மகப்பேற்றுக்குப் பிந்தைய பாதுகாப்பு.
  • தாய்ப்பால் ஊட்டுவதன் முக்கியத்துவம்.
  • தம்பதியர் மற்றும் திருமண வயதினர்க்குக் குடும்ப கட்டுப்பாடு விதிகள் மற்றும் பிறப்புக் கட்டுபாட்டு முறைகள்.

பிற தகவல்கள்:

• பாலியல் கல்வி: விடலைப் பருவம் சார்ந்த மாற்றங்கள் பற்றிய தகவல்களைப் பாலியல் கல்வி மூலம் பள்ளிகளில் கொண்டு வருதல்.
• கருத்தடை முறைகள் குறித்த விழிப்புணர்வு:
  • மக்கள்தொகையைக் கட்டுப்படுத்தப் பயன்படும்.
  • எளிதில் கிடைக்கும், பயனர் நட்பு, பக்கவிளைவு இன்றி, பாலுணர்வைத் தடை செய்யாமல் பயன்படுத்தலாம்.
  • இதில் தற்காலிக மற்றும் நிரந்தர முறைகள் உள்ளன.
  • எடுத்துக்காட்டுகள்:
    1. இயற்கைக் கருத்தடை முறை - பாலூட்டும் கால் மாதவிடாயின்மை
    2. தடுப்பு முறைகள் - வேதிப்பொருள், இயக்கத் தடுப்பு முறை
    3. ஹார்மோன் வழித்தடுப்பு
    4. உள்கருப்பைச் சாதனங்கள் (Ex, CuT)
• கருக்குழல்தடை (Tubectomy):
  • அறுவை சிகிச்சை மூலம் கருத்தரித்தலைத் தடுக்கும் முறை.
  • பெண்களின் அடிவயிற்றில் சிறு வெட்டு மூலமாகவோ அல்லது கலவிக் கால்வாய் வழியாகவோ இரு அண்ட நாளங்களும் வெட்டப்பட்டு முடிச்சிடப்படுகின்றன.
  • இதனால் கருவுறுதல் மற்றும் கருவுற்ற முட்டை கருப்பையை அடைவது தடுக்கப்படுகிறது.
• விந்து குழல் தடை (Vasectomy):
  • அறுவை சிகிச்சை மூலம் ஆண்களின் இனப்பெருக்கத்திறனைத் தடுக்கும் முறை.
  • ஆண்களின் விதைப்பையில் சிறு துளை மூலம் இரு விந்து நாளங்களும் வெட்டப்பட்டு முடிச்சிடப்படுகின்றன.
  • இதனால் விந்தணுக்கள் சிறுநீர் வடிகுழாயினுள் நுழைய முடிவதில்லை; வெளிப்படும் விந்து திரவத்தில் விந்து செல்கள் காணப்படுவதில்லை.

மெல்ல கற்கும் மாணவர்களுக்கான விடை :

ஆரோக்கியமான மக்கள், உடல்நலம் மிக்க குழந்தைகளைப் பெற்று சமுதாயத்திற்குப் பங்களிக்கின்றனர்.

குடும்ப நலத் திட்டங்கள் மற்றும் முறைகள்

இத்திட்டங்கள், ஆரோக்கியமான சந்ததியைப் பெறவும், மக்கள் தொகையைக் கட்டுப்படுத்தவும் உதவுகின்றன.

1. பாலியல் கல்வி (Sex Education):
   • விடலைப் பருவம் சார்ந்த உடல் மற்றும் மன மாற்றங்கள் குறித்த சரியான தகவல்களைப் பள்ளிகளில் வழங்குதல்.
2. கருத்தடை முறைகள் (Contraceptive Methods):
   • மக்கள் தொகைப் பெருக்கத்தைக் கட்டுப்படுத்த இவை பயன்படுத்தப்படுகின்றன.
   • சிறப்பியல்புகள்: எளிதில் கிடைப்பவை, பயன்படுத்த எளிதானவை (பயனர் நட்பு), பக்க விளைவுகள் அற்றவை, பாலுணர்வைத் தடை செய்யாதவை.
   • வகைகள்: தற்காலிக மற்றும் நிரந்தர முறைகள்.
   • எடுத்துக்காட்டுகள்:
     • இயற்கைக் கருத்தடை முறை: பாலூட்டும் காலத்தில் மாதவிடாய் வராமல் இருப்பது (Lactational Amenorrhea).
     • தடுப்பு முறைகள்: வேதிப்பொருட்கள் அல்லது இயக்கத் தடுப்பு முறைகளைப் பயன்படுத்துதல்.
     • ஹார்மோன் வழித் தடுப்பு: ஹார்மோன்களைப் பயன்படுத்தி கருத்தரிப்பைத் தடுத்தல்.
     • உள் கருப்பைச் சாதனங்கள் (Intrauterine Devices - IUDs): காப்பர்-டி (CuT) போன்ற சாதனங்களைப் பயன்படுத்துதல்.

---